Joan-Francés Blanc ei un autor mes qu’originau dera sciéncia-ficcion occitana. Publiquèc en 1998 un classic d’aguest genre que non auriá d’èster excludit de nat lista de bons autors occitans deth genre. Aué ja poirie èster considerat coma un classic dera sciéncia-ficcion deth nòste país e açò sèrie principauments per un hèt: era sua immensa originalitat damb eth roman Heisei.
Acostumadi a veire ena television o eth cinema sagues de divèrsi tipe – e entre aguestes es de caire espaciau – podem arribar a desbrembar que, de còps, era singularitat umana ei tanben simbèu de creativitat e donques d’originalitat. Aquerò tanben pòt vier en autors de Gasconha e aguest ei eth cas de Joan-Francés Blanc.
Damb eth son libe Heisei, entraram en ua òbra màger dera sciéncia-ficcion. Era sua man nos transportarà, òc, a travèrs deth temps – enquia er alunhat an 2078 – mès tanben e mes important encara a travèrs der espaci siderau. E tot açò sens desbrembar en nat moment qu’es personatges d’aguesta cuerta mès tanben grana òbra, son…quiòc, e poirie pas èster d’ua auta manèra…occitans !
Arrasons entara esperança
Heisei ei ua magnifica òbra de sciéncia-ficcion dividida en tres parts – eth futur dera planeta Tèrra – çò qu’ens hè pensar e repensar quin poirie èster eth nòste futur coma umans ena planeta -, un viatge a travèrs des esteles espaciaus entar ua aluenhada planeta aperada Heisei –e çò que s’i debanarà un còp i auràn arribadi ua multitud d’occitans que viatgen a travèrs der espaci – e poirie èter qu’ac hessen sens volontat -.
Atau, eth long viatge que hèn milièrs de persones ei hèt en es husades imperiaus – de quin empèri parla Joan-Francés Blanc sèrie ua bona arrason entar lector entà liéger aguest libe – Asa Maru e Ben Maru. Aguest serà eth qu’ocuparà desparièrs capítols de Heisei e que hen d’aguesta òbra ua des mes originaus aué dera sciéncia-ficcion occitana.
Permetetz-me aquí restacar Joan Francés Blanc – pera sua originalitat coma escrivan – damb un des autors estatsunitencs mes grani deth sègle XX: Frederic Pohl. En efècte, aguest autor, fòrça conegut per sua saga de divèrsi libes aperada Portico, mene eth lector laguens un univèrs de husades a travèrs dera exploracion der espaci galactic a desparières istòries que descriuen coma seràn es futurs viatges en er espaci e quines causes e races i descobrirà era espècia umana. Ua verdadièra jòia dera literatura de sciéncia-ficcion.
Heisei de Joan-francés Blanc serie ja ua beròia òbra de sciéncia-ficcion occitana pera sua prumèra part, on trapem era descripcion des pròplèus 70 ans dera istòria dera planeta, d’Euròpa e d’Occitània. Era solucion utilizada per autor hè deth libe ua amassada de suspreses pera sua logica e racionalitat. Mès Blanc va encara mes luenh en tot descríuer com poirie èster un viatge a travèrs der espaci de tot un pòble, ua nacion dera planeta. Aquí es detalhs – damb sauts de velocitat includidi – sus era vida vidanta de milièrs de persones en un viatge coma aguest, hèn de Heisei ua òbra, dilhèu, unica.
En eth viatge i aurà revòltes, hame, set, fauta d’oxigèn, relacions sexuaus e violéncia. En definitiva, tot çò que hè ena sua vida vidanta er èster uman. E se eth futur dera Tèrra non ei guaire bon – segontes eth nòste punt de vista actuau – eth pessimisme der inici de Heisei marcharà pòc a pòc entar un optimisme intellectuau sus er èster uman que serà descrit a travèrs des accions que patirà ua collectivitat umana en ua nòva planeta. Encara i pòt aver esperança.
Era narracion de Heisei ei leugièra. Segur. Ac ei tan que en finir eth libe eth lector vò contunhar e coneisher que serà çò que passarà as següentes generacions que viueràn en aguesta planeta – ua sòrta de salvacion d’ua o mes d’ua petita nacion terrestre-. Ei aguest eth moment de demandar ar autor d’escríuer ua dusau part. Es aimants dera sciéncia-ficcion en occitan ne serián contents !
De mès, era prosa utilizada ei practica, pas malaisida, precisa, beròia. Ua utilizacion deth gascon que permet a gascons mès tanben as autes occitans d’entrar en aguesta beròia varianta dera nòsta lenga e conéisher atau ua des òbres mes originaus dera sciéncia-ficcion occitana des darrèrs ans. Escrita en gascon per Joan-Francés Blanc. Un nom que cau pas desbrembar se aimam aguest genre literari: ua arrecomanacion de lectura totau. Traparètz eth libe en es Editions des Regionalismes. Ua òbra que, maugrat cuèrta ei encara aué ua òbra major.
Christian Andreu
diunegre.com 