Qui èm ?

Diu Negre qu’ei la purmèra revista numerica especializada dens la publicacion deus tèxtes de sciéncia ficcion, de fantasia, de policièr e de fantastic en occitan (qué que sii lo dialècte) o dens d’autas lengas. Perméter a cadun, amator o confirmat, de publicar dens un espaci comun, de partatjar las soas produccions qu’ei l’idea que hasó vàder aqueste projècte.  Encoratjar la produccion literària, ajudar los qui ne gausan pas escríver en portà’us conselhs e correccions. Diu Negre qu’ei un espaci de partatge, d’escambi, ua zòna de contacte dirècte enter los autors e los lectors, entà perméter un tornar vertadèr suus escriuts perpausats a la lectura.

L’equipa Diu Negre que demora obèrta a totas las volontats qui la vòlen ajudar dens lo son projècte. S’i voletz participar que’ns podetz contactar sus Facebook, Twitter o suu quite site dens la partida contacte.

 Lo Diu Negre que v’espèra…

Equipa DN : 

Autors/Redactors : 

Remèsi Bòi : vadut en 1990 tà Pau, estudiant en LLCER Occitan a l’Universitat Paul Valéry Montpelhièr III, regent de calandreta e benevòle a Per Noste. Ahuecat de literatura e d’escritura (SF), d’istòria antica, medievau e sociau e de lingüistica romana.

Christian Andreu : nasquèt a Barcelona en 1972, estudièt jornalisme a l’Universitat Autonòma de Barcelona e istòria a l’UNED e son especialitat es la politica internacionala. Parla uech lengas dont l’occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.

Theò Bajon : nascut en Avinhon en 1998, estudiant en Sciencia Politica / Europa a l’Universitat d’Avinhon e en LLCER Occitan a l’Universitat de Montpelhièr. Felibre, passionat per la lenga nòstra, l’istòria, la litteratura e la musica.

Vincenç Claverie : Après estudis seriosas mes shens nat engèni en amainatjament deu territòri, Vincenç Claverie que’s hè susar en las collectivitats tà las quaus e trabalha. Que se’n profieita entà complir la coneishença e vàser l’especialista deu patuès, deu gascon e de l’occitan deu son quartièr. Lèu, que s’avisa que sia la medisha causa e que’ns comprenem aisidament de Bordèu dinc a Turin dab un chic d’esfòrç e hòrt de bona he. Dempuish un detzenat d’annadas que junh uas companhias de teatre e de musica contemporanèa au Bascoat e en Gasconha on trabalha tà l’administracion e la produccion deus lors projèctes. En 2013 que’s pòrta candidat tà la webtele occitana www.octele.com entà har produccion e pr’amor d’ua enganada de seleccion que s’arretròba devath las lutz de l’empont e que presenta au cors d’ua sason l’emission D’Òc Show. Qu’a en hasti los carricampatges. Que l’agrada lo hardcore american e la sonsaina auvernhata.