Per Remesi BOY

10au quilomètre, matiada, 00’08’’ 00

Que soi sol.

Sol enqüèra.

Enqüèra de cap a l’escuranha,

que’m resigni : aqueths astres enlugarnants, qui s’èran revelats a jo, que s’embruman adara. Seguent los lors axes shens nat esgard mei, s’escapant d’afèli a perihèli, que’s tiran de la mea vista. N’i avè pas sonque lo mei lent peu demiei d’eths entà’m gratificar enqüèra d’un huec luenhèc. Freula doçor, proximitat improbabla de la quau e’m paria tròp de d’òra :

Que soi sol.

Aquera realitat glaçanta n’escapa pas ad arrés ; arrés non pas har abstraccion deu men pesuguèr, acordà’m la victòria o anoncià’m peu demiei deus ganhants shens provocar l’ilaritat de la multitud ací amassada. E totun, tau com Neptuna, que fondi au men còr torrat lo projècte dessenat de non pas arribar lo darrèr. La corsa qu’ei longa, pro entà que’m sii permés d’esperar : e serí d’aqueths qui’s concilian las Moiras ? D’aqueths mortaus qui s’i escaden, mercés a la lor obstinacion, a har de Clotò ua Penelòpa, de Laquesis ua Ariana e d’Atropòs ua Aracnea ?

Aqueste dia e serà lo deu men apoteòsi ? Que m’ac gausi pensar, víver.

Totun, que travi aqueth arsec omeric qui m’avia enlà deus mens limites, m’exortant a distanciar l’implacable Tanatòs, aqueth eisherumi obsessiu qui’m taloa : ne soi pas Atalanta.

La hilha de Pelion, la sageta mei velòça d’Artemís, non me deishè pas lo temps de véder a shudar l’ombra soa : tanlèu lo despart dat, qu’èra déjà luenh davant. Ne podoi pas qu’apercéber, e ua pausa sonque, lo son peu arrosegant de las caudas colors de l’ajòu son, cohatant peus aires com mila banèras. Que parti shens virà’s, en me deishant peu demiei de la canhada glapitanta qui s’arronça dejà aus sons darrèrs.

Tots que’m passèn shens nada pena, mes ne’n tienoi pas nat cas. Au men dehens, ua causa que s’ei estupada, negada per las aigas escuras de l’abséncia. N’èi pas sonque ua delèra : Qu’Atalanta e tornar en·huecar lo men larèr.

Lavetz… lavetz que corri e que’m resigni a’c har sol.

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s