Per Nicolau Granier

Plan ‘sietat dins sa camioneta blancha, Ahmed atendiá. Dins mins de cinc minutas la
clòcha eschinlará e quò ne’n sirá ‘chabat de sa vita. A penas vint ans e eu ‘nava desjà
rescontrar Diu. Sa mòrt se ‘prueimava e pertant eu era v-urós, en patz …
Vint ans, quò fasiá benleu un pauc cort per ‘na vita de maucresent, mas quò era ben pro
per ‘na vita emplida de l’amor d’Allah …


E pertant, las chausas ne’n eran pas totjorn entau estadas. Ahmed se tras-suveniá : una
enfança urosa dins un pitit vilatjon costat Limòtges, daus parents aimants, un frair ainat
protector, … eu ‘viá tot per reüssir. Mas quò era sens qu’eu ne demainatgesse dins la
banlega parisiana e que n’entresse au liceu. Quò ne fuguet pas ‘cepte de s’integrar a la
debuta. Quò fuguet mesma tot lu contrari. Los autres adolescents ne l’aimavan pas e eu
ne sabiá pas perqué. Benleu qu’eu era tròp diferent, benleu qu’eu ne fasiá pas pro
d’esfòrç, o benleu ben que n’i aviá pas de rason. De tot biais, quò era entau e pas
autrament.


La rentrada nonmàs passada, las prumieras insurtas ne tarderen pas ‘ribar. ‘Las fugueren
tòst segudas de chausas pus chaitivas coma daus cròchapiès dins la cort o de las
tustadas dins los pissadors. N’i aviá pas un quite jorn sens qu’un de sos « tomentaires »
ne li faguesse quauquas miseras. Lu pieg qui-dedins, quò era que tots los liceans vesián
çò que se passava, mas que degun n’ausava ren dire. L’omerta regnava … Mai, per ne
pas ‘dobar la situacion, chasca vetz qu’eu tornava chas se un pauc « abasit », Ahmed
trobava totjorn una excusa per se justificar auprès de sos parents. Atanben, queus-qui ne
se dobtavan de ren …


Entau, quand eu resontret lu Rachid mai son grope d’amics, Ahmed se sentisset reviscolat
d’abòrd. Per un còp dins queu liceu, um l’acceptava coma eu era. Eu tornava viure … En
mai de quò, sos nuveus amics eran un pauc coma se : daus estrangiers que degun
n’aimava. Per contra, a la diferença de se, tot los monde los cranhian e los laissavan
‘donc en patz. Que, faliá ben iò dire, quò n’era pas daus enfants de cuer, quilhs
magrebans. Ilhs eran baralhaires coma pas de creure e ilhs montavan redde en colera.
Amhed tornet trobar entau auprès d’ilhs la proteccion mai la complicitat qu’eu ‘viá perdut
despuei qu’eu n’era pus escolarizat coma son frair.


D’alhors, quò era en granda partida mercés a quela nuvela amistat qu’eu ‘viá ‘chabat per
se far ‘pelar Ahmed. En efiech, son prumier pitit nom – son nom de baptisme – era JoanGlaudi. Brave o pas, quò era lu qu’avian chausit sos parents lu jorn de sa naissença e quò
fuguet queu-qui qu’eu gardet ‘cianta au mament de sa conversion.
Quò eran sos amics que li ‘vian parlat de l’Islam en prumier. Ilhs li ‘vian tot explicat e
detalhat : lu Ramadan (lu june), la pregiera, la Zakat (l’aumòsna), … tot. Ilhs li ‘vian
tanben dich que quò era ‘na religion de patz, que tots los muslims (los musulmans) eran
frairs entre ilhs e se devian aidar quau que siá lu problema. ‘Na tau fraterniat, pensatz,
quò lu ‘viá pivelat d’abòrd lu Joan-Glaudi … Mas quò ne fuguet totparier pas ‘na rason de
tot far a la lesta. Tot quò-qui maduret daus longs mes de temps dins sa testa avant qu’eu
ne prenguesse sa decision.


Quò faguet qu’eu era desjà adulte lu jorn que recitet la shahâda (la profession de fe
musulmana) e que venguet de facto musulman. Eveniment urós per se mai per sa nuvela
comunautat, Ahmed ne faguet pertant pas de festa per l’ocasion, nimai ne l’anonciet a sos
parents. Qu’era-a-dire qu’eu veniá d’una familha catòlica praticanta e eu ne pensava pas
que sa chausida fugesse aculhida aveque benvolença. Gardar un secret era ben pus aisat
per se que non pas d’endurar los jutjaments daus autres.


Quò li ‘ribava donca regularament de minjar dau pòrc e de beure dau vin sens ne’n far
d’estat pendent los longs repas dau Diumenc, totjorn prenguts en familha.
Per contra, un còp a l’acelat de sa chambra o ben tot defòra coma sos amics, quò era
auren. N’i aviá pas pus pietós nimai pus rigorós que se. Eu respectava rigorosament tots
los principis de l’Islam. Que quò fuguessen los dau Coran (lu libre sent) o ben tot los daus
Hadîths (los dires dau Profeta), eu semblava conseitre tot e eu voliá coneitre tot.
Eu ‘viá ‘na tau set de sapcher qu’eu despasset bien viste sos amics dins lu domeni
religiós. Au bot de quauquas setmanas, eu comencet mesma de los corrijar a perpaus de
pitits detalhs.

A la debuta, queus-qui iò prengueren a la risèia. Quò era mesma pustòst normau per un
neo-cresent de far un pauc de zele. Mas, quand quò venguet tròp regular e tròp seriós,
ilhs comenceren de s’elunhar de se. E, pitit a pitit, ilhs ne lu sonavan pus, ilhs ne lu venian
pus querre lu ser per ‘nar trainar dins lu quartier, ilhs chamgeren ‘ciant’a lur quita sala de
pregieras per qu’ilhs ne lu crosessen pus … Ilhs l’abandonavan tan redde coma ilhs lu
‘vian acceptat …


Completament prengut per sa nuvela vita espirituala, Ahmed se’n mocava. Eu ne ‘viá pas
besoenh de quela canalha que lu frenava dins sa questa de saviesa islamica.
D’alhors, per quò-qui, pas besoenh de degun : internet era ‘qui. ‘Na vraia miràudia, quela
tecnologia, per un còp ! Los fòrums musulmans ne mancavan pas. N’i aviá de tot semen
aveque totjorn un quauqua ren nuveu de legir o d’aprener. Ahmed ne’n aviá jamai pro. L’i
passava tot son temps de leser. A la riba d’un mament, quò ne’n ‘ribet a un tau poench
qu’eu se metet de cherchar de la gent pariers coma se : daus vrais muslims, drets e fiers ;
e non pas daus cresents pervertits per la societat occidentala e la modernitat de queu
monde decadent.


Quò fuguet sur la partida acaptada de la rantela, lu dark-net, qu’eu los trobet …
Dins la camioneta, Ahmed tornet dreibir los uelhs. La clòcha eschinlava defòra. Los
enfants començavan de surtir de classa. Lu Timing era perfiech. faliá ‘li ‘nar d’abòrd …
Ahmed prenguet lu temps de recitar un darrier còp la shahâda puei enrotet son veïcule.
Dins a penas cents metres e mins de vint segondas la volontat de Diu sirá complida.
Glòria a Allah !

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s