Per Remesi BOY

Lo St¨n que la se tornè obrir lèu tà tornar bavar çò qu’avè bavat : sus la soa associada sustot. Abans qu’aurí bavat dab eth, mes qu’aví la boca seca. Tota la mea energia qu’èra concentrada sus çò qui m’esperava. Lo biaish qu’èra simple : qu’aví a estupar las mitralhetas e a esperar. Anavan viéner ? Quiò. La velha ne s’i èran pas ensajats : que s’i tornaràn au ser. La question qui’m virava lo cibèu qu’èra lo prètz. Quant anavan gratar tà l’informacion ? Un max segur ! Despuish lo temps que’s copavan lo mus sus bèth calibre, ne m’anavan pas har un rebaish.

Que pugèi au clèish tà tirar dinc a la 139. St¨n qu’èra bagolaire, com de costuma. Tot qu’i passava : deu malh dinc a l’associada, de l’associada dinc au malh. Que virava pèc eth tanben. La soa votz a las aurelhas, lo camin que’m pareishó mei long. Ne l’escotavi pas mei. De tot biaish, que se’n trufava beròi, que podè parlar tot sol ua passadassa. Qu’èra estat tròp sol, tròp longtemps. Lo St¨n que’m deishè en me shiular un ne’t hacis pas cremar redondant. Que’u tornèi un tu tanpòc convençut. Ne l’entenoi pas mei. Que profieitèi deus quilomètres de rèsta entà mesurar los riscs.

A la 139, tot que’m pareishó d’estar normau. Tanlèu la pòrta obèrta, l’andrò de servici que’m bavè lo son rapòrt deu dia. Nada ataca, nat domau tanpòc. Que comencèi a’n har de la fina. Dus dias shens nada herratalha, qu’èra ua purmèra e ua novèla qui saborejava au merdar. E n’avèn tròp gahat contra las mitralhetas ? Estossi lo cas, qu’èri empegat beròi. Esmalit, que’m tirèi l’andrò deu puisheu. Qu’aví ua ronha de sògra. Quina guinha ! Per un còp que’m volí lhevar la gòna, n’i avè pas arrés tà passà’i la man. Que n’aví la caguèra. Lo cuu esmapat sus un cadierau crebat, que’m gahavi la cara. Ne vienossin pas, dinc a quan te m’anavi pelar, Géncer adromida de las lordèras ? Vertat qu’èras agradiva, a espiar sustot, mes ne’t podí pas guardar. Que n’i auré avut tà’m pausar questions e çò que’us aurí tornat ? Mèrda probable. Qu’èi tostemps traishamandejat com un andrò au barbituric. Que pensèi lèu e mau. Totas las solucions qui’m truquèn cerimana ne valèn pas ua toca de moquira. Qu’èri com aqueths piros de publicitaris hèits tà l’asile : pèc shens ac sàber. Qu’anavi deishar quan me gahè l’evidéncia : l’arcuelh qu’èra tròp glaciau ! Que’m lhevèi sobte, com se l’estrambòrd e m’avè dat a las patèrnas. Qu’aví lo dequé tà’us aguishar. N’avèn pas sonque ua causa a fóter : busocar peu parçan.

Segur, lo plan ne dè pas un arsec deus grans a l’andrò 14 113. Per estar ua maquina, qu’avé tostemps avut lo dequerò tà sauvà’s la pèth. Qu’esitè donc quan lo demandèi d’anar busocar enlà deu boclèr energetic. Que’m caló convence’u dab un devís deus cons suu sens deu sacrifici en temps de crisi. Los andròs…

Qu’acceptè, grandós de participar a ua òbra qui l’èra superiora : la qui m’anava sauvar lo cuu. Que passè los vivariums insectalhas com un eròi de guèrra qui va au salader e shens nada suspresa que se’n prenó ua. Qu’i èran. Rassegurat, que comencèi l’operacion seduccion. Podossi foncionar. Que cadoi pesuc suu cadierau entà m’i gahar. Que’m sequèi lo boclèr energetic e que passèi las defensas en manuau. N’èri pas pas pèc au punt de las estupar sancèra. Dab los fars exteriors qu’ensagèi tots los còdes mei simples que coneishí. Que hasí dab lo hèit que n’èran pas tròp cons : tà’s pelar ua vita enlà deus dòmas, be calè estar fin. Davant los ecrans de susvelhança, qu’èri a l’argüèit deu mendre efluvi, mes ne m’amuishèn pas arren. La nueit qu’anava estar de las longas. Vertat, l’ahar qu’avè l’anar d’un gahatèr e dilhèu n’èran pas pro pècs tà estar ausards. Qu’aví donc a’m pelar ua serada television, lo cuu pegat sus un cadierau crebat, davant un programa deus maishants.

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s