Star Trek Discovery

Per Joan Frederic Brun

« Star Trek », o sabètz totes de segur, es una sagà de non jamai finir (mai de 730 episòdis, siá 530 oras de film) ont l’America miralha dins una fresca de « space opera » gigantal, dempuòi mièg sègle, son agach sus lo mond contemporanèu e tanben sus sa cultura de Sciéncia Ficcion. Las prumièiras serias, dins las annadas 60 avián quicòm que poiriam considerar ara coma un pauc ninòi, mas cau prene retrospectivament la pagèla de son originalitat. Dau temps de la guèrra freja contra la Russia, lo realizador Gene Roddenberry imaginava una societat utopica egalitària e generosa que portava dins l’univèrs de valors de frairetat e de patz. Siaguèt un dels prumièrs fulhetons ont una eroïna afro-americana teniá una plaça importanta. Lo vaissèl espacial NSS Enterprise viatjava mai prompte que lo lum en s’engulhant dins la « distorsion » e son equipatge se privava pas de passar d’un endrech a l’autre amb una tecnica de teleportacion qu’èra un regal, òm los vesiá se desmaterializar e se rematerializar a distància. De segur aquelas tecnologias se retròban de contunh dins la seria e fan partida de la « marca de fabrica » tant coma lo polit vaissèl emblematic « Enterprise » amb son grand disc de metal e sas alas que traucan ardidament los espacis infinits.

« Star Trek: Discovery » (creat per Bryan Fuller et Alex Kurtzman) es donc la sieisena seria d’aquela sagà. Es estada lançada als USA sus la cadena CBS en septembre de 2017 e dins lo demai de la planeta (au mens dins 188 païses) es difusida per la platafòrma Netflix.

L’istòria se dabana en 2256, es a dire abans la màger part dels autres episòdis, un pauc a la començança de la sagà. Au moment ont una guèrra terriblassa contra los redobtables Clingons vai s’empusar. Aquela gu-èrra fai poartida dau passat dins los erpisòdis ja vistes, e se’n parla per allusions. Aquí anam la viure en plen. D’en primièr fasèm lo rescontre de l’oficièr Michael Burnham, una jove umana abalida sus Vulcan e carrastelada per l’exigéncia etica pròpia a aquela cultura, que se pòt pas dire que siá moligassa. Malurosament Michael, que semblava promesa a un avenir de tria dins Starfleet, es la responsabla de l’incident diplomatic que trai tot aquel canton de la Galaxia dins lo conflicte, e es transferada sus lo vaissèl Discovery bailejat per lo capitani Gabriel Lorca. Estranh capitani e estranh vaissèl. Un cercaire de tria, lo luoctenent Paul Stamets, es en trin de descobrir qu’un malhum de vida miceliana atravèrsa las divèrsas dimensions de l’espaci e permet de navegar d’un autre biais d’estèla en estèla sens passar per la distorsion. Aquò se ditz la navigacion esporica. Utiliza de camparòls. Mas tot aquò es tot novèl, a l’estadi experimentau. Una error de navigacion los trai lo temps de quauques episòdis dins un univèrs parallèl ont retròban de personatges que son eles meteisses mas un pauc diferents. Quora quel estraviatge esterlucant s’acaba retròban l’univèrs familiar. Mas aquí las causas van bravament mau, los Clingons son en trin de ganhar la guèrra cap e tot, son a mand d’atacar la Tèrra. Urosament, l’equipa dau Discovery fòrta dau secrèt de la navigacion esporica aurà l’estèc de sauvar in extremis lo pairòu, e la patz amb los redobtables Clingons pòt èsser signada. Mas aquò s’es pas fach solet, i auràn banhat tant e mai la camisa.

E i a una segonda sason que manca pas de grandor tanben. Un àngel roge vengut dau futur qu’òm se demanda s’es pas Michael ela meteissa (mas es mai complicat qu’aquò) interven per que se forvièsse un avenir terrificant ont d’entitats mecanicas destrusirián tota vida biologica dins la Galaxia, e lo Discovery e l’Enterprise afrontan aquel perilh terriblàs que fai passar dins un luònh futur en s’engulhant un trauc de vèrme. Dins aquela seria retrobam l’emblematic vulcanian Mr Spock, tot jovent, temporàriament vengut baug au mitan d’aquela istòria desavianta. Baug perdequé èra tròp lucid…

Per l’imaginacion de las tematicas e la qualitat visuala dels esfièches especials aquela seria es una pichòta belòria, que de segur enriquesís la longa sagà d’una polida tièira d’episòdis…

Au meteis temps una autra seria sus Amazon Prime vau tanben l’òsca, es « Star Trek Picard » ont retrobam l’emblematic e boleguiu capitani de l’Enterprise Jean-Luc Picard retirat dins sas vinhas en Provença, mas tornarà s’envolar cap a las estèlas per afrontar una conspiracion secrèta empusada per los Romulians, autra civilizacion galactica pas gaire manèla, e que sus la basa de profecias ancianas trabalha a exterminar tota vida de sintèsi o ibrida. Aquí tanben l’ombra de l’amenaça de las maquinas que prendrián lo poder. Seria capitada tanben amb de polits personatges qu’an una densitat veraia, Picard (Patrick Stewart) sempre lo meteis, carismatic, e puòi d’autres mai o mens parcialament sintetics, e d’efièches especiaus esbarlugants.

Amb aquelas doas serias la sagà Star Trek se renòva d’un biais qualitadós, revisitant e alargant l’univèrs creat per los mai de 700 episòdis passats.