L’abraçada deu Yoshi – I

Peu Corginista

— Que son 8h deu matin. Adishatz sénher. Tot que va de lis. La votz requista d’Amandà, seleccionada peu demiei d’un trentenat d’enregistraments, que’m tirava tostemps de las meas nueits barbituricas.

A despieit qu’aví los muscles amortosits, que’m lhevèi d’un som shens trobles, ni saunei; clacant la mea lenga pegada au cèu de boca per letargia. Qu’èra un còma qui’m permetèva de tirar un trèit sus la velha. Ua escadença. Entà poder gaudir un dia tot navèth shens nat passiu. L’idea que m’agrafè durable sus la cara, tostemps adromida, un arrisolet clarinós. Que me n’arregaudiva tant que m’arroncèi tau costume blisterejat. Verd poma, còssarrat, perfèit.

— Un veire d’aiga de pès, la santat au pitèr, ce’m digó Amandà en tot s’amanejar a la cosina dens ua musicalitat sabuda.

Un veire que’s hartava d’aiga, ua copa de fruta qui’s hasè ua longa e graciosa rotacion suu platèu blanc nacrat e ua lesca de pan qui, dab plaser, e’s tostava la crosta. Qu’èra com l’opera qu’estimavi mei, escotat inlassable, deu quau podèvi díser «Ací l’aviada… ací l’intermèdi, ací lo recitatiu». Que hasoi adonc la mea entrada sus l’empont com un solista avertit dab las purmèras notas de la mea playlist en lectura sequenciau qui expirava pasibla deu Lo-fi jazzy.

— Que’vs perpausi un escantilh de navèths tròç, tipe Chill-out, tà completar la vòsta lista.

Davant la mea tòsta, las proposicions que pareishèn sus ecran veirat. Qu’èran totas de las purmèras e adaptadas beròi a la mea hami. Musicas d’un tebèr relaxant, armoniosas.

— Atau, qu’avalori las crompas e que las horneishi a la vòsta seleccion. Que prenoi un horrup d’aiga tà béver la gota.

— Que’vs voi informar que sorteishi de comandar sau de lítium. Qu’arribarà doman. La recepcion que’s debanarà a nau òras deu matin. Aquesta anóncia ne volè pas díser sonque que viení d’avalar l’ua de las darrèras dragetas… Amandà qu’èra avisada; que s’emplegaré de la recepcion.

— Enqüèra ua jornada de las bonas, ce’m digó Amandà abans de hornir, qu’ètz perfèitament dorèc. Si ve’n vatz d’ací vint minutas, que seretz de d’òra au vòste projècte collaboratiu.

L’idea qu’èra bona e que sortii ahuecat. Deu men trepader enlà que podí enténer las cliquetadas qui vorrolhavan automatic los lindaus. Aus mens davants, un espaci pavat beròi e cerclat per tres entradas. Ensacats par las gautas, los mens uelhs n’avèn pas sonque la causida d’ahroncilhar suu còp deu baticòr qui’m seguiva despuish ençà; a ostentar suus pòts l’imperturbable gai. Tornar véder los mens collègas agradius ne’u podè pas sonque amplificar. Qu’estom quate a’s saludar, escarrabelhats. Que baishèm amassa com cada matin a balhar lo noste sentit sus la darrèra video de gat, qui avè ahuecat au mot per mot la tela. Ua subercauha deus serviders, shens gravetat. Que ns’avèn acertat a las informacions. La pretension d’aquestes gats d’estar leons dab las lors crinièras de pan de motle qu’èra a hóner d’arríder. Los nostes pegaus que’s perdón per carrèras.

Répondre

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion /  Changer )

Photo Google

Vous commentez à l'aide de votre compte Google. Déconnexion /  Changer )

Image Twitter

Vous commentez à l'aide de votre compte Twitter. Déconnexion /  Changer )

Photo Facebook

Vous commentez à l'aide de votre compte Facebook. Déconnexion /  Changer )

Connexion à %s