Disseccion

Per Felip Biu 

En Quaranta tres, Per Noste edicions, 2019.

Item, a uoch de mai, fo portat a Montpelier un peis pres prop de Seta,

lo qual avia de lonc entorn una cana, et era gros coma un ase, et era pelos coma ase […]

et avia davant pres del cap dos braç amb mans e cinc detz formatz en cascuna man,

amb las onças nozadas coma de persona […]

Lo Petit Thalamus de Montpelhièr

 

En qualitat de capmedecin de la marca deu Nòrd, qu’èi l’aunor de portar a la coneishença deus membres egrègis de la Comission d’enquista reiau lo compte rendut de la disseccion practicada suu sol especimèn en pro bon estat arretrobat suus lòcs de l’eveniment.

Com ac avèn notat los purmèrs testimònis, la creatura, grana com un òpi comun, que’s semblava drin a la crisalida d’un lepidoptèr. De hèit, lo còs medish qu’èra envolopat hens ua manièra de cocon hèra solide, pro regde e inèrte qui, causa estranha, ne semblava pas estar organic. Totun, un fenomèn de mineralizacion o de necròsi post-mortem particulara que poderé explicar aqueth estat. Adara d’aulhors, qu’ei quasi tot çò qui’ns demora deu subjècte, la rèsta que s’ei consumida hèra lèu.

Ua auta ipotèsi que seré que l’envolòpa estosse un clesc per’mor que, tot en emparant los membres de la creatura, que’us deishava libres, çò qui permetè de remarcar de tira qu’èra un tetrapòde. Los membres que s’organizavan per pars de longors diferentas. Sus un cinquau membre, ardon e hòrt brac, la susfàcia deu cocon qu’èra dura e polida.

Quan incisèm, dab hèra de mau, aquera envolòpa, un get de gas que gessí, shens que podóssem díser si avè ua foncion fisiologica o si èra consecutiu a un començament de putrefaccion deus organes intèrnes.

Au dehens, que trobèm lo còs medish qui, si l’analogia dab lo lepidoptèr ei pertinenta, e poderé representar un estadi larvari. E de hèit, que presentava un aspècte hèra freule e pro moth.

L’envolòpa ubèrta, que podom examinar mei en detalh los quate membres. Provedits de tres articulacions, que s’acabavan aus estrems per ramificacions mei petitas e articuladas eras tanben, ce semblava. Qu’ei probable que, per un par de membres au mensh, aqueras ramificacions avossen ua foncion arrapaira.

Lo cinquau membre, restacat au còs per ua articulacion, qu’èra màgerment cubèrt d’excrescéncias filifòrmas, esloishas, tròp nombrosas tà que las podóssem comptar, e solidament enradigadas devath deu dèrme. Que podem supausar qu’èran organes sensoriaus, sensibles a las vibracions bissè. Aqueth membre que presentava cinc orificis dont l’un èra ua extremitat deu conduit digestiu. Dus orificis, hèra estrets, qu’èran arreligats a un sistèma respiratòri intèrne. Ne podom pas determinar a qué servivan los autes dus.

La « larva » qu’èra recubèrta sus quasi tota la susfàcia per ua purmèra pèth on corrèn canèrs estacats au cocon, qui tienèn enqüèra un liquide aquós. Mes aquera pèth qu’estó de bon tirar. Que’s pòt har l’ipotèsi qu’èra en fèit ua pèthmudada, dejà seca o quasi.

Per devath, ua dusau pèth qu’aderiva mei hòrt au còs, dirèctament en contacte dab lo teishut muscular irrigat per un hialat d’artèrias e de veas contienent sang coagulada.

Hens la partida centrau deu còs que cabèn un sistèma digestiu pro primitiu, organes dedicats a la respiracion aeriana, un muscle cardiac biventricular, e d’autes organes dont ne podom pas precisar la foncion.

L’ensemble deu còs e deus membres qu’èra sostiengut per un endoesquelèt pro interessant qui devè balhar a la creatura la capacitat de’s màver en un enviroament sosmetut a ua pression hòrta.

L’endoesquelèt qu’èra copat a mantun endret, çò qui avè causat lesions aus organes intèrnes e lhèu provocat la mort.

Nat element non permetó d’avalorar lo grad d’intelligéncia de la creatura.

Qu’acabèm aqueste examen per ua analisi espectrometrica de l’envolòpa extèrna. A costat d’elements shens gran interès, que descobrim çò qui sembla estar un tetragrama e un trigrama, lo sens deus quaus e ns’escapa. Lo tetragrama e lo trigrama que son aquestes :

NASA

USA

imatge : Nacho Diaz.

Répondre

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion /  Changer )

Photo Google

Vous commentez à l'aide de votre compte Google. Déconnexion /  Changer )

Image Twitter

Vous commentez à l'aide de votre compte Twitter. Déconnexion /  Changer )

Photo Facebook

Vous commentez à l'aide de votre compte Facebook. Déconnexion /  Changer )

Connexion à %s