Era isla deth mau

1Eruin Dulean ei ua isla qu’a ua maldicion. Eth mau vò governar era isla – isolada dera umanitat a maugrat deths noms e des tradicions celtiques qui hèn pensar a ua Irlanda irreau, fantastica – qu’ei prèp d’aquesta en diuèrsi moments dera istòria dera isla. Ei atau coma Gregorz Rosinski e Jean Dufaux, un polonés e un belga, mèstres dera benda dessenhada actuau, qu’an volut hèr un aumenatge entara fantasia medievau e entath mon cèlta. E qu’ac an hèt d’ua manèra originau e susprenenta.

Era Balada des Lanes Perdudes” ei donques era istòria d’ua gojata e tanben deths sòns ancessors, qu’an lutat tostemps contra eth mau – aqueth mau qu’a laguens era umanitat des deth principi deths temps e que non acabe jamès – e que, de viatges, non a podut evitar. Ei era istòria de Sioban, princesa dera isla, hilha de Wulf, eth lop blanc, que moriguec en tot lutar contra eth magician Owan, dera sua mair, mès tanben de toti aqueri qu’an volut ajudar-los ena luta contra eth mau.

E çò que comença en tot èster çò que semble ua luta individuau de Sioban contra es maus que tornen tostemps ena isla, acabe per èster ua cronica dera luta de tot un pòble, de tota ua nacion – de tota era umanitat dilhèu – ena luta contra eth mau (qu’a èr òme laguens sòn e que malurosaments tostemps torne e torne).

Qu’ei atau era luta deth sergent Droop, que vò rebrembar era legenda dera Balada des Lanes Perdudes a Sioban pr’amor quan eth mau torne entara isla era a de saber quaus son es sues origines e com cau sauvar era isla deth mau. Ei tanben era luta der amor de Droop entara Dauna Gerda, ua hemna mès vielha qu’eth, mès qu’ei bona, fòrça bona, entath sergent, e qu’ei deth costat deth bonur e qu’eth mau arrestarà d’arribar a bon fin.

Tot açò pr’amor que, coma ditz Sioban, un viatge e un aute laguens d’aquera epopèia fantastica medievau – on i an animaus fantastics com es ouki e es wombes que donen un aire totauments fantastic a ua istòria que sovent eth lector pense qu’ei reau – er amor ei laguens eth còr deth mau. O ei eth mau qu’ei laguens eth còr der amor ?

2

Ua istòria d’amor e d’òdi

Solament er amor pòt sauvar era isla d’Eruin Dulean deth mau. E er amor ei eth que naishèra laguens eth còr dera jove gojata Sioban. E quan eth mau conquistarà eth sòn còr solament i a ua gessuda: era mòrt. Pr’amor qu’açò vò díder qu’eth mau ei pro poderós e qu’era isla e sòns abitants non pòden, non meriten d’èster sauvadi.

Ei tanben era Balada des Lanes Perdudes era istòria dera luta dera maire de Sioban, Lady O’hara, contra eth matrimòni qu’a d’auer damb Lord Blackmore – un matrimòni de pura conveniéncia- que non agrade arrés, ne ara pròpria Lady O’Hara.

Pr’amor que Lady O’Hara ei era veuda de Wulf, eth lop blanc que sauvèc un còp era isla deth mau, dera magia nera, e que moriguec en ua batalha contra eth mau deth magician Pedwan, que conquistèc dempús tota Eruin Dulean. E ara a de maridar un aliat de Pedwan.

Dempús es prumères pagines Rosinski, creador tanben de bendes dessenhades coma Thorgal – qui non coneish Thorgal se ei un aimant dera benda dessenhada europèa? – balhe un quadre nere e ges agradiu. Eth lector aurà de lutar contra se madeish entà superar es prumères pagines que descriuen un mon que semble eth dera nòsta pròpia umanitat. Damb toti es sòns defèctes e virtuts. Damb eth mau e er amor qu’a era umanitat laguens sòn e que de còps desespere er òme o era hemna que vò, damb una benda dessenhada, demorar bèth temps sens auer de pensar ena realitat que i a ath torn dera sua vida.

Sioban, era doça gojata, luta contra un sergent des òmes de Pedwan e met era sua vida en perilh. Ara cau que Lord Blackmore la defense. Ac harà. Ac pòt hèr ? Solament un òme qu’arribarà deth passat, un shivalièr deth perdon, poirà la sauvar . Arrés mès a pro poder ena isla enta’c hèr. Arrés es pro poderós coma Lord Pedwan entà i lutar e sauvar era petita gojata.

3

Seamus, shivalièr deth perdon, sauvarà Sioban en mès d’ua ocasion e l’ajudarà encara mès a rebrembar qui ei. Dilhèu pr’amor que qui rebrembe qui ei non ei arrés ? E pr’amor que solament er amor pòt sauvar aquera isla dera fantasia.

Quan sentiràn arribada era Balada des Lanes Perdudes, era legenda que torne entà èster reau, es armades se premaniràn un aute còp entara luta contra eth mau, contra Pedwan. Es armades des vius e tanben es armades des mòrti. E coma se siguessen es armades des eròis des istòries de Tolkien, es abitants dera isla lutaràn ara entara sua supervivéncia entà sauvar Sioban, eth clan dera gojata, es Sudenne, mès tanben eth futur dera isla.

Era lengua des mòrti

Sioban aprenerà era lengua des mòrti entà poder dirigir es armades que lutaràn, fin finau, contra eth mau. E eth fin dera luta arribarà d’ua manèra naturau pr’amor qu’era umanitat ei bona o maishanta? Qui a de ganhar donques ?

Dempús dera destruccion –non definitiua deth mau – deth Penegician Peduwan, eth bonur e eth bon governar tornen entara isla de Eruin Dulean dera man de Sioban, que semble ara s’enamorar d’un còr pur coma eth deth shivalièr Clide Klanach que, (tanben) vò eth perdon, pr’amor que son paire non volguec lutar damb Wulff, eth paire de Sioban.

Mès eth mau a de tornar un aute còp coma ena realitat pr’amor que non ei istòria dera umanitat, mès era istòria dera luta dera umanitat contra se madeisha ? E ac harà dera ma de Lord Carfont e era sua maire. 4

Damb ua bevenda especiau empoisonarà eth còr de Sioban e conquistaràn un aute còp damb eth matrimòni eth poder mès gran dera isla. Pòc a pòc es abitants dera isla veiràn qu’eth nau senhor dera isla non ei çò que cerquen e comencen a preparar conspiracions contra era pròpia Sioban, qu’ara ja non ei mès Sioban.

Un còp mès era populacion dera isla d’Eruin Dulean escota era Balada des Lanes Perdudes e un còp mès lutarà contra eth mau. E se cau tanben, ara, contra era madeisha Sioban, que ja non ei mès amor, mès mau. Pr’amor qu’ei er amor qu’ei laguens eth còr deth mau o ei eth mau laguens eth còr der amor ?

Un còp mès es mòrts tornaràn a parlar. Un còp mès eth passat tornarà entà sauvar eth present e eth futur dera isla (o dilhèu dera umanitat ?). Ei atau coma Rocinski e Dufaux – eth creador dera serie fòrça coneguda de Djinn- acaben ua benda dessenhada que poirie ben èster ua epopèia sens fin, ua balada qu’ei era madeisha istòria dera umanitat.

E maugrat que semble èster era istòria de Sioban des Sudenne qu’a de limpiar er aunor dera familha e sauvar era isla der enemic mès nere, solament era vertat e eth ben poden trionfar. Era profecia dera isla dera Balada des Lanes Perdudes ditz que “un dia reneisherà çò que moriguec ena terra e serà escotat un cant, e qui l’escotarà se levarà en armes contra eth mau”. Serà aquera profecia çò que sauvarà tanben aué era umanitat. Ac esperam damb Rocinski e Dufaux, damb Sioban e Clide Klanach…ac esperam.

Christian Andreu

5

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Cambiar )

Google photo

You are commenting using your Google account. Log Out /  Cambiar )

Twitter picture

You are commenting using your Twitter account. Log Out /  Cambiar )

Facebook photo

You are commenting using your Facebook account. Log Out /  Cambiar )

Connecting to %s