Lo mostre au noste dehens

Despuish lo començar deu sègle vintau ne comptam pas mei lo nombre d’adaptacions deu roman de Mary Shelley, Frankenstein or, The Modern Prometheus publicat en 1818. En efèit, aquera òbra qui coneishó un succès deus grans tanlèu la soa publicacion, qu’estó adaptat au cinèma haut o baish seishanta còps. Lo purmèr realizator qui s’i ensagè qu’estó J. Searle Dawley en 1910 (cort metratge de 16 

minutas disponible a gratis).

Qu’ac avetz comprés, uei lo Diu Negre que’vs parlarà d’aqueth univèrs deus rics. Mes perqué, quan lo subjècte e sembla d’estar estarit après dus sègles de lecturas e d’interpretacions ? Pr’amor un tau subjècte que contunha de dar l’aviada a l’imaginari popular : pèças de teatre, serias, filmes e jòcs videos. Au moment quan nse legetz un filme mei dens l’univèrs de Frankenstein qu‘ei a’s har e que sortirà en 2018 (Frankenstein dab Javier Bardem).

Uei que parlaram donc de l’adaptacion mei recenta gessida d’aqueth univèrs : lo filme Doctor Frankenstein de Paul McGuigan sortit en 2015.

La seleccion d’actors :

Dab Daniel Radcliffe (Harry Potter, La Dauna de Negre) dens lo ròtle d’Igòr (l’assistent deu Doctor) e James McAvoy (X-Men, Split) dens lo ròtle deu Doctor Frankenstein, lo filme que s’apièja sus ua equipa d’actors d’experiéncia qui balhan ad aquera adaptacion un ritme dinamic e poderós. Lo cople Radcliffe/McAvoy que fonciona de plan en aquera relacion enter un Frankenstein a huec brandant e un Igòr mei apasimant. Aqueste personatge, que ne trobam pas dens lo roman de Shelley, que jòga lo ròtle de la consciéncia morau deu scientific. Un ròtle qui horneish a l’istòria ua color d’umanitat en tela de hons que n’èm pas acostumats a véder en aqueth univèrs tradicionaument classat com gotic.

Los autes actors ne desmeritan pas tanpòc, au contra : Jessica Brown Findlay (Downton Abbey, Harlots) dens lo ròtle de Lorelei (l’amor inacessibla d’Igòr) que hè entrar, en ua intriga tròp masculina, un personatge feminin actiu e de capatge. Ua iniciativa a la mòda de la quau lo filme ne pateish pas briga com ac podèvam crànher au començar. Andrew Scott (Jim Moriarty dens la seria Sherlock) que confirma, s’ac calèva, la soa capacitat a jogar lo maishant ròtle. Ací qu’interprèta l’inspector Turpin, lo perseguidor zelós qui vòu hicar lo scientific en estar de non mau har, qué que sii lo prètz. Que notam tanben l’enterlusida deu gran Charles Dance (Game of Thrones, Alien 3, etc) dens lo ròtle deu pair Frankenstein qui contrasta beròi dab lo personatge libre pensaire deu hilh. Que citam tanben Bronson Webb, Daniel Mays, Spencer Wilding, Robin Pearce peus ròtles recurrents. Ua seleccion d’actors de las bonas qui s’i escad a portar quauquarren de nau ad aqueth univèrs coneishut e pro ancian.

L‘ambient :

Au contra deu roman de Shelley qui divideish la narracion en tres (lo raconte de Victor Frankenstein, lo raconte de la creatura e lo dusau raconte deu scientific) lo realizator que causí d’amuishar meilèu lo caminament qui miè Frankenstein a crear la soa creatura. L’accion que’s debana a Londres au bèth miei de la revolucion industriau. L’ambient qu’i ei escur, mecanic e electric ! Imaginatz ua vila de las granas, embrumada peu veu negràs e espés de las usinas, quilhadas en tela de hons com los temples de l’espleitacion umana.

Qu’ei tanben ua atmosfèra de conquèsta scientifica qui s’apièja hèra (dilhèu tròp) sus l’oposicion enter la sciéncia e la religion. En efèit, aquera adaptacion que sembla d’estar ua luta permanenta tà l’emancipacion de l’òmi. Un combat frenetic qui ahisca los protagonistas a anar tostemps mei luenh dinc a aténher lo punt shens tornar. Qu’ac avetz comprés, que s’ageish d’un filme nerviós qui destilla scènas d’accions de las bonas dab gran quantitat de slow motion (sustot au començar) e d’afrontament brinchut. Los amators ne seràn pas decebuts !

Lo personatge d’Igòr :

Com ac avem notat per abans que s’ageish d’un personatge qui n’existeish pas dens lo roman de 1818 e qui hè la soa purmèra aparicion dens lo filme de 1931 dab lo nom de Fritz. Dens l’adaptacion de Paul McGuigan, Igòr qu’ei shens que l’assistent deu Doctor, qu’ei lo son amic tanben. Considerat per aqueste personatge com lo son parion. Igòr que dèisha lo ròtle de l’assistent passiu entà vàder un doble de Frankenstein. Entà estar mei precís, que vad lo Frankenstein que Victor e seré podut estar, n’avossi pas viscut lo drama iniciator de la soa set de vita.

De mei, aqueth filme que hè d’Igòr ua allegoria de l’òmi/bèstia qui vad l’òmi/sabent. Lo mostre qui s’i escad a tirà’s de la soa condicion de misèria per la coneishença. Un messatge susprenent qui balha ad aqueth personatge meilèu segondari dens las autas adaptacions ua plaça màger.

Lo personatge d’Igòr qu’ei donc, dens l’interpretacion de McGuigan, un purmèr ròtle, parion de Victor Frankenstein shens lo quau aqueste n’averé pas podut har arren, mes ne’n disem pas mei !

L’avís deu Diu Negre :

Que s’ageish d’un filme deus agradius qui divertirà probable los mei exigents en matèria de fantastic. Pro fidèu a l’intriga deu roman, lo realizator que prenó totun quauquas libertats pagantas (sustot peus personatges) qui permeten de vàder accessible a tots un messatge universau. Las scènas d’accions a còps possivas que’n pòden butar daubuns. A despart d’aqueth bemòl lo Diu Negre que’vs conselh aquera adaptacion de mei, qui s’i escad a’ns divertir. Un bon punt quan sabem que la màger part e coneishen dejà, haut o baish, l’intriga d’aqueth classic de la literatura britanica.

Diu Negre