Major Ҫarglà (IV)

Per Joan-Claudi Puech

Au Sénher President de la Confederacion dei pὸples subrevivents de la Tèrra

Sénher President, vos mandam çai-jonch una transcripcion de l’enragistrament que l’organisacion clandestina “Escomaires deis ondas”, aviá interceptat, en l’an 2023 de l’autra èra, just avans l’explosion per dei terroristas de l’espitau militar dau Vau dei Gràcias (París). Avèm retrobat aquὸ dins leis archius de l’anciana presidéncia francesa. Es lo testimὸni dau generau Delagrange, sus son liech d’espitau, a cent vint-e-un ans!

“ -Me sovèni, just après sa reeleccion lo president Carmon èra ambé nosautrei, en persona, per una operacion de nuech dins un vilatge d’Arièja que n’ai oblidat lo nom. Mai vos parla d’aquὸ, èriam a la debuta dau sègle vint-e-un!

I a que lo president que sabiá çὸ que cercaviam. A un moment prenguèt un “icὸsaedre” ( un solid dei vint fàcias, un truc de matematician). Nautrei cresiam qu’èra un joguet! Adonc lo prenguèt dins sei mans, quichèt sus una dei ponchas e vai-ti pas que la besingonha se despleguèt, puèi que se faguèt tant fina coma un fieu de coire! E roja! De brasa! Mai cremava pas! Una autra quichada e aquela linha se transformèt en un pichὸta bilha, pas mai grὸssa qu’un céser!

-De qu’a dich lo president?

-Èra mut! Simplament una causa; “Aqueu grum es l’objèct, a la meteissa massa;” Après, prenguèt d’unei pinças e lo joguet tornèt prene forma. Lo meteguèt dins sa pὸcha e quatecant garceriam lo camp.

-E l’ostau?

– Èra lo d’un matematician, mὸrt un desenat d’ans avans. Un Alexander ὸ Alexandre, segon, me sovèni plus dau nom qu’èra pas aisat de retenir. Rus benlèu, vesètz? L’ostau èra estat sagelat per lo ministèri de l’interior. Èriam en tὸrt. Una efraccion, coma sovent.

-Ne’n podètz dire mai sus aquel matematician?

– Trabalhava sus la geometria de l’espaci. Tanben voliá trobar l’unitat prefonda dei matematicas! Un fadὸli qu’a viscut quaranta ans coma un ermitan! Aviá demandat a un amic que li cremèsse totei sei recèrcas! Urosament…

– D’unei dison que siatz en cavilha ambé l’Universitat de l’Umanitat Aumentada de la Silicon Valley?

– Conariás!

– A de veire tot aquὸ ambé vὸstra longevitat fὸra nὸrmas?

– ………..

(bruchs) Fin de l’enragistrament.

De seguir