Alien Covenant : avèm pas mai paur de la bèstia !

Alien Covenant, seguida proclamada de Prometheus, conta l’istòria de l’equipatge del vaissèl Covenant, carrejant un cargament dels especials : de colons en iper-sòmi ! Son mandats per la companhiá Weyland Yutani (totjorn ela) per colonizar una planeta luenchenca. Coma de costuma, lo viatge es interromput (vos daissam descobrir perqué), l’equipatge deu anar explorar una planeta a proximitat pr’amor an captat un senhal e qu’an l’obligacion per contracte d’anar veire a de qué rima. Sus plaça, tornan trobar un personatge ja present dins Prometheus, vos daissarem descobrir lo qual. Se podètz pas esperar, anatz veire de videòs portant la mencion « Spoiler Alert ». Si que non, podètz contunhar la vòstra lectura.

Sortit en salas lo 19 de mai, lo filme fa pas l’unanimitat. Clarament, la reaccion del public es pas la qu’esperava son realizator. Crudèl, lo jornalista Olivier Gasnier Duparc (del jornal libanés L’Orient du Jour) a parodiat l’eslogan de la saga Alien per titolar son article : « dins l’espaci, degun vos ausirà dormir ». Ouch ! Cal dire qu’en visionant lo filme òm es luènh d’aver un ritme cardiac dels nauts. Prometheus, semblant mai una faula filosofica que non pas un thriller aviá un ritme acceptable e confòrme a las esperanças. Amb « Alien Covenant », òm esperava una cèrta dinamica digna dels tres primièrs episòdis. Òm esperava aver pro paur en dintrant per susvelhar de prèp los recantons mai escurs de son domicili, per èsser segur que pas res ne sortisca… Mas non. Après Alien Covenant, poiretz dormir prigondament. Malgrat totes sos esfòrces, Ridley Scott a pas capitat a nos tornar espaurugar amb son « xenomòrf ».

Las solas scènas que fan pujar lo ritme son de simplas scènas d’accion. Las scènas de ueis claus metent los personatges dins una situacion de vulnerabilitat respècte a la bèstia son tròp raras… e benlèu voidadas de lor consisténcia pr’amor son tròp esperadas. Coneissèm de còr la faiçon qu’an los Aliens de « nàisser », sèm doncas vaccinats. L’eqüacion es pas solvabla. Scott se justifiquèt en se picant de portar d’informacions novèlas. Mas òm bastís pas un filme unicament per de motius narratius. Aquò vòl dire que fasiá pas forçadament mestièr d’assegurar una transicion entre Prometheus e l’univèrs dels Aliens tal coma o coneissèm. Son confraire George Lucas se’n poguèt mainar tan crudèlament quand faguèt la prelogia de Star Wars. Mai important : es una error fondamentala de se voler lançar solet dins una seria de filmes d’aquela mena. Que siá la triologia d’origina de Star Wars o la d’Alien, son agradivas perque an mobilizat de realizators diferents ! Urosament per Star Wars, JJ Abrams a pres la relèva en 2015, seguit ongan per Rian Johnson. Alien n’es encara a l’estadi de la prelogia. Nos cal crosar los dets per qu’una autra còla de realizators pòscan donar un segond buf a la franquisa.

En fait, Alien Covenant fa pas que dire çò que foguèt ja dit dins Prometheus : quand l’òme se prend per Dieu, aquò s’acaba mal. Mas s’adreça pas al nòstre inconscient, aquò sollicita pas que lo « subre-ieu » se tornam prendre la terminologia freudiana. Per aquela rason, los tres primièrs Alien avián una prigondor insospechabla. La bèstia materializava de faiçon concrèta çò que lo nòstre inconscient o çò que lo nòstre èsser collectiu podiá aver de mai trebolant, inconfessable o quitament òrre. Lo primièr filme, sortit en 1979 jos l’uèlh del quite Ridley Scott, presentèt una bèstia simbolizant lo desir sexual còsta lo desir de mòrt (sabètz : lo bon vièlh parelh d’Eros e Thanatos). L’Alien e son univèrs èran sortits del cervèl fecond de l’artista soïssa Hans Ruedi Giger (1940-2014) dont las visions mesclavan biomecanica e sensualitat destorbanta (cf. « Necronomicon » publicat en 1977). Lo segond filme, realizat magistralament per James Cameron (1986) explorava el l’inconscient estatsunidenc pòst-guèrra del Vietnam. Aqueles marines colonials que pensan anar a la « caça al parpalhon » sul planetoïd LV-426 (ont se debana l’accion del primièr Alien) semblan furiosament lors omològs que pensavan sortir victorioses sens pena del conflicte en Asia. Dins l’excellent Alien 3 realizat en 1992 per David Fincher, la bèstia sembla mai… una bèstia ! Es a dire qu’en aparéncia, a mens de caracteristicas umanas que non pas los autres. Sembla mai un « lion » que caça los « zèbres » coma o ditz fòrt justament lo personatge de Ripley. Aqueles detenguts sus la planeta-preson Fiorina 161 que servisson de cachacrosta a l’Alien son la ratafalha qu’òm vòl escondre e, de faiçon literala dins lo filme, eliminar. Paradoxalament, aquela bèstia crudèla nos sembla mai qu’o podèm creire (o sabètz plan : sèm de lops pels nòstres semblables, es conegut). Lo quatren Alien (1997) a subretot coma interès la transposicion de la vision de Jean-Pierre Jeunet dins aquel univèrs particular. Pels dos filmes « Alien vs. Predator », serà sens comentari.

Malgrat aquel resquisitòri e aquelas pròvas a carga, nos cal èsser justes. Una de las particularitats de la franquisa es qu’unes de sos filmes an pas agut un succès immediat. A còps, nos cal aprene a presar una òbra a còps de visionatges regulars (lo geek a parlat). Alien 3 n’es l’exemple mai provant. Un còp visionada la version vertadièra que Fincher voliá prepausar al public (disponibla en DVD amb la version sortida en salas), òm compren perqué l’òme aguèt tan de succès per la seguida, foguèsse pas qu’amb lo film « Seven ». Cal dire que, compte tengut de la situacion delicata dins la quala Fincher deguèt menar lo rodatge (un scenari tornat escriure cada jorn), òm pòt èsser emmaliciat contra la Fox que se mesclèt un pauc tròp de çò que la regardava pas. Meteis constat pel segond Alien ont avètz tanben un « Director’s cut » plan melhor que la version sortida al cinemà e que foguèt chaplada per d’imperatius comercials. Dins las annadas ochanta, caliá quitament pas somiar de far un filme de mai d’una ora e mièja. Urosament, amb aquel montatge novèl, comprenèm melhor l’intriga que Cameron nos voliá presentar. Per tornar al temps nòstre, Prometheus vielhís plan. Se al cors d’un visionatge en salas, òm se podiá ja regalar dels panoramics delicioses de l’introduccion, òm compren pauc a pauc çò qu’a volgut dire Ridley Scott per la seguida. Poirem dire la meteissa causa d’Alien Covenant ? Daissem passar lo temps e subretot reservem de seradas de visionatge per ensajar de veire de causas que benlèu nos auràn escapat.

Clamenç Pech

Dessenh : Jòc 

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out / Cambiar )

Twitter picture

You are commenting using your Twitter account. Log Out / Cambiar )

Facebook photo

You are commenting using your Facebook account. Log Out / Cambiar )

Google+ photo

You are commenting using your Google+ account. Log Out / Cambiar )

Connecting to %s