Leis aventuras de Joseta Kroner

Los ahuecats de literatura que pòden sortir las clucas, lo Diu Negre que torna dab ua navèra critica qui’vs harà descobrir (dilhèu) la vita d’ua vielha esteleta omivòr, perduda peus sons sentits, enter òdi e passion e qui n’a pas sonque ua hami, tornar a l’anonimat. Planvenguts dens l’univèrs de Matèu Poitavin e lo de la soa Joseta Kroner. Un univèrs parallèle, on los òmis e sons tots parièrs, los jornalistas de la premsa people avides, las vielhas cagantas e lo sèxe omnipresent. Un monde qui’vs deisharà un sentit de dejà vista… Coïncidéncias ? Probable que non !

L’intriga que’ns presenta purmèr com un escambi enter dus personatges, un Tam (qui plan segur n’a pas arren a véder dab l’autor) e un Rachid Birba, documentalista chepiquejat per la desapareishuda de l’estela deu son darrèr filme « Joseta Kroner : una vida d’estèla” e dab la quau entertien ua relacion amorosa complicada. Un filme, lo monde deu cinèma, ua estela qui desapareish abans la sortida d’aqueth documentari, tots los ingredients que son aquí entà que los dus personatges e comencin l’enquèsta. Mes ne’n serà pas atau, l’òbra de Matèu Poitavin ne segueish pas los camins escorruts peu genre policièr. En efèit, l’intriga que passa viste a un trio amorós on los còdes e son enversats. On lo galant ei gelós e possessiu, lo marit shens nat poder sus la dauna e aquesta totaument descabestrada, libra d’ac deishar tot darrèr era tà passar a auta causa. Tot aquò descriu dab ua lenga shuquenta, rica e populara, qui dèisha tota la lor plaça a l’argòt e a las trivialitats. Aventuras com las que’ns pòden contar un Florian Vernet o un San Antonio. Las qui’vs hèn arríder, dab situacions improbablas, referéncias tot bèth just celadas a l’actualitat deu moment e replicas assassinas dignas de las punchlines mei bonas de Simonin.

L’intriga que s’acaba com s’acaba (se la voletz conéisher qu’averatz a léger drin, lo libe n’ei pas long, un centenat de pagina haut o baish), drin mei seriosa que lo començar de l’òbra vertat, mes en demorar de bon léger, ananta tot doç de cap a la devira. La patz après los auratges de la passion probable…

Ua fòrma e ua escritura modèrna

Que i a shens que l’intriga, los personatges e las replicas qui hèn d’aquera istòria, un raconte originau e modèrne. Lo son escritura n’estó pas la d’un òmi sol, assedut davant lo son ordinator, los uelhs fatigats per ua nueit d’insomnia.Briga, l’escritura d’aquera òbra que’s passè suu blòg de l’autor (qu’ei la mòda) http://lou-tam-tam.blogspot.fr dab l’ajuda e los comentaris deus lectors. Qu’èra dont un Work in progress com ac ditz lo quite autor, enriquit per los lector qui balhèn lo lor punt de vista sus l’istòria qui’s bastiva drin a drin. Aquera escritura quotidiana qu’avèva com quadre lo noste monde e las soa actualitats, qui ne manquèn pas pendent las annadas Hollande.

Lo biaish d’escríver qu’influencè forçadament la fòrma. En efèit que podem comptar trenta très capítols, pro bracs, hèits d’ua pagina dinc a sèt. Ua bre

vetat qui balha vertadèrament lo sentit d’un huelheton de bon seguir e on los personatges ne s’estancan pas d’evoluar au grat de las lors aventuras. Benalèjas qui s’acabaràn en la vila de Portò, vila que l’autor e visitè dus còps entà estar au mei pres de l’ambient qu’i regna e de la vita qui s’i passa. Un ambient tot hèit de normalitat dab tela de hons la crisi economica e las soas repercussions sus la vita deus ciutadans. Ua escritura modèrna qui mescla donc, en parodiar plan segur, l’umor flingant e ua realitat tota just exagerada… mes tanben personatges qui ve’n harà véder de totas. Luenh deus estereotips qui ne haré quauquarren de vulgar, aquera istòria qu’ei dens la fòrma com dens lo hons d’ua modernitat planvienguda e arrefresquenta.

Lo punt de vista deu Diu Negre                

Leis aventuras de Joseta Kroner qu’ei ua òbra que poderem qualificar d’O.V.N.I de la literatura occitana. Vertat qu’ei de mau classificar e balhà’u un genre precís que’ns forçaré a redusir un univèrs qui justament ne vòu pas estar embarrar e qui’s trufa beròi de las etiquetas. Mes com ac sabetz dejà probable au Diu Negre que l’agradan las causas indefinidas e trebosas…

Aquera istòria de bon léger qu’ei conhida d’umor e de referéncias de tot ordi, qu’ensajaratz de portar a la lutz sovent en de balas. Pr’amor que demora ua ficcion e que lo noste monde n’ei pas sonque un tela de hons, com la tela deu cinèma, element indispensable tà véder projectà’i lo filme de la vita de la Joseta qui passè la soa a ne víver d’autas.

Enter lo policièr e la farcejada, aquera òbra qu’agradarà a tots los ahuecats deus tèxtes tot d’un qui dèishan a las lordèras l’emfasi e las frasas pomposas d’un aute temps. Dirècte e percutent, Leis aventuras de Joseta Kroner que ns’amuisha dilhèu lo començar d’un autor prometedís dens un genre au quau las navèras caras e hèn vertadèrament besonh. Un libe a léger shens moderacion donc…be passaratz un moment dab la Joseta non ?

Diu Negre

Leis aventuras de Joseta Kroner (Les aventures de Josette Kroner) – (13 €, 196p., bilingue, edicions L’Aucèu libre) disponible sus http://www.espaci-occitan.com