Era istòria mes grana dera galaxia

 

Parlar der Incal aué pòt èster ja un trabalh perdut pr’amor que des dera sua publicacion en 1989 ja s’a dit absoludaments tot ( o gaireben ) sus aguesta benda dessenhada e sòns autors; Alexandre Jodorowsky (Chile, 1919) e Moebius (Jean Giraud, 1938-2012). Totun, avèm pensat qu’ua bona bibliotèca com era deth diu negre non poirie aver aguest vueit. Atau, er Incal de Moebius e Jodorowsky ei un des classics mes grani qu’a eth mon dera benda dessenhada universau. E pr’aquerò, e solament pr’aquerò, ja n’avèm volut hèr era critica.

Er Incal ei un comic estonant qu’a mes de 300 pagines e que siguec creat pendent es annades 1980 per dos gènis dera creacion artistica com Jodorowsky e Moebius. Se era istòria per era madeisha ja ei polida, es illustracions d’un gran dera benda dessenhada com Moebius (que començèc a èster conegut pera benda dessenhada de Blueberry enes anades 1960 e encara d’auti qu’aué formen part dera bibliotèca dera benda dessenhada basica universau que toti es amants deth genre aurien de liéger un còp au mens) dan ad aguesta istòria illustrada ua reputacion mes que meritada.

Pr’açò precisaments, pr’amor qu’er Incal ei fòrça mes qu’ua benda dessenhada. Ei ua istòria illustrada, ei ua novèla o dilhèu tanben un roman illustrat e non solament pera sua grana extension – comencèc a èster creada en 1980 e non siguec finida enquia 1988 -, mès tanben pera qualitat dera istòria madeisha escrita per Jodorowsky e eth mon de Moebius, qu’atrape eth lector en tot l’aver sequestrat enquiara darrèra pagina.

Un mon estonant

Çò que cride mes era atencion der Incal ei era complexitat deth mon creat ath torn de John Difool, un detectiu de dusau classe que demora en ua planeta tan aluenhada que non se pòt descobrir on ei. Ei aguesta complexitat – maugrat es absurdi dera istòria pr’amor qu’ei solament ua benda dessenhada – çò que da mes valor ara istòria que se desvolòpe enes pagines der Incal.

Ena istòria i traparam òmes lop e emperatritz de formes surrealistes, alienigènes absurdi com es berg e eth madeish incal – ua forma viva qu’a ua procedéncia divina. Mès, e açò ac volem soslinhar , maugrat tot aquerò, ei ua istòria que desvolòpe era sciéncia-ficcion enquia arribar a ua des nivèus mes nauts jamès creats en eth genre dera benda dessenhada.

Tot comence quan John Difool es lançat per un pont en ua vila futurista. Serà sauvat in extremis per robòts policièrs e après liberat. Ua nòva mission – que hè arríder pr’amor dera sua simplicitat – menarà Difool a acompanhar ua gojata qu’a de tornar a casa abans des 00.00 ores. Non cau díder qu’era gojata anarà as barris mes degeneradi dera vila entara recèrca de musica, drògues e sèxe e que non finirà eth termini pr’amor de sòns instints mes basics. E didem basics pr’amor que finís per hèr er amor damb un òme lop. Des d’aguest moment era vida vidanta de John Difool non serà mes com avie estat abans. En un tunèl eth detectiu tròbe ua caisha dins eth cos d’un alienigèna que dintrarà dins son cos: er incal.

Pòc après, toti començaràn a cercar er Incal d’ua manèra hòla: sicaris der Amok – era cap dels rebèls dera vila, alienigènes desconegudi – es berg – e mutants que luten entre eri per aver er Incal. Ara serà Deepo, amic de Difool – estranh amic pr’amor qu’ei un audèth – qui aurà dins son cos er incal. Dempús arribarà era policia, era armada privada deth president e fin finau es òmes dera guardia personau der Emperaire dera Galaxia. Toti cerquen ua causa; çò qu’a de dar eth poder mes gran conegut dera epòca e eth domeni de tot er univèrs.

Era prumèra mòrt de Difool

John Difool serà mòrt peth madeish incal entà demostrar eth sòn poder a un Difool que non cre en arren ne arrés. Aguesta, que serà era prumèra mòrt de Difool ena istòria d’aguesta benda dessenhada, hè encara mes cresible era istòria creada e desvolopada peth gran mèstre dera narracion Jodorowsky.

Dempús tot açò, començaràn a aparéisher divèrsi personatges que seràn, mes tard, es que formaran era companhia d’eròis e eroïnes qu’acompanharàn Difool en sòn viatge galactic: eth Metabaron – un personatge tan important ena istòria qu’un aute illustrador, Gimenez, li balhèc ua sèrie pròpria que tanben ei aué coneguda per èster un des classics dera benda dessenhada dera sci-fi, Era Casta des Metabarons -, era reina der Amok, fraia dera reina des arrates- es rebèls que luten entà destruïr er orde establit ena galaxia – e Cap de Can (qu’ei un òme lop). Eri balharàn un sens, ua logica totau ara prumèra des sies istòries der Incal; er Incal Negre.

Er Incal lutz

Era Tecnofraternitat tanben vòl er Incal. Mes John Difool tanben ne poirà escapar. En tot ac hèr trobarà era sua estimada Animah. Aguesta avie estat damb Difool hège annades e maugrat er amor infinit deth detectiu pera reina des arrates, jamès l’a volut de vertat.

Fin finau, començarà era rebellion generau. Eth govèrn der Emperarie ei despotic e non a cap respècte pera vida o es libertats. Toti es ciutadans dera galaxia – en çò qu’ei ua des critiques mes herotges en ua benda dessenhada entath mon apatic on demoram aué – era nòsta societat n’ei un exemple pro clar – solament an eth sens dera vida a travèrs des canals televisius manipuladi des deth govèrn imperiau. Mès i a un aute èster – era Emperoratritz que governe pas atau e qu’ei era esséncia de çò bon ena galaxia.

Un des darrèrs personatges que hè era sua aparicion en er incal ei Solei-Lua, hilh de Difool e Animah e qu’aurà un des ròtles mes grani d’aguesta saga galactica. Dempús era casuda dera vila, deth govèrn, de tota era planeta, era companhia d’amics de Difool e aguest an de hugir. Er Emperaire, hòl de ràbia – a enviat un robòt per los aucir. E semble qu’arren lo pòt arrestar.

Mès er incal balharà encara mes fòrça ara Companhia e aguesti poiràn superar, pòc a pòc, toti es perilhs que tròben. Era complicacion tecnica dera istòria arribarà a un punt naut – regal de Jodorowsky – pr’amor que Solei-Lua se transformarà en una nau espaciau que permeterà ara Companhia arribar enquiara planeta on demoren es darrèrs soldats dera Emperoratritz, ja queiguda.

Es enemics mes grani dera Galaxia, era Tecnofraternitat, a deishat anar milèrs de ueus gigants que destruïssen mons sencers, planetes e tanben esteles. Solament pòt èster vençuda era escuror damb era Gran Sòn e entà’c arténher Difool aurà de copular – e òc avèm dit copular – damb era reina dera raça alienigèna berg – pr’amor que toti es abitants dera galaxia ath còp sónien e atau poiràn véncer era escuror. Dempús arribarà era dusau mòrt de John Difool.

Era cinquau esséncia

Es Tenèbres seran finauments atacades pera Companhia e era armada de Solei-Lua, qu’ara ei eth nòu Emperaire dera Galaxia. E Difool aurà de convéncer 78 milions de hilhs e hilhes sòns e dera reina des berg que cau soniar – aguesta necessitat tan basica e ath còp tan complèxa der èster uman e que mos hè precisaments açò, umans- entara sauvar era Galaxia.

Pendent er atac finau des Tenèbres Difool coneisherà un èster que dilhèu da sens a tota era istòria der incal. Mès era sua personalitat divina non mos permet de’n parlar. Solament cau díder que dempús lo conéisher John Difool tornarà ar inici dera istòria e tornarà a quèir deth pont dera megavila on a demorat tostemps. Ei ua istòria sens fin, com er univèrs.

Era suspresa finau da un sens totau a tota era istòria der Incal e non la volem desvelhar. Solament destacaram aquí qu’un des messatges mes prigonds de Jodorowsky e Moebius en er Incal ei era necessitat qu’avèm toti de soniar. De desvolopar mons irreaus e istòries que dilhèu – o dilhèu òc – non existiràn jamès e que solament ac haràn en es nòsti caps. Aguesta ei era esséncia dera benda dessenhada. Aguesta ei era esséncia dera sciéncia-ficcion.

Aguesta critica vòl èster tanben ua nòva votz ena defensa de genres literaris entà adults qu’enquia aué encara son consideradi menors.Com eth dera benda dessenhada. I a milions de persones que compren bendes dessenhades de sciéncia-ficcion o de fantasia ena planeta tota. Açò non ei cap garantia, ac sabem, mès tanben pensem que son aguestes istòries es que mos permeteràn soniar, hugir dera realitat qu’avèm ath nòste torn e que non estimam.

Son es istòries que mos ajuden a èster en definitiva umans – ua caracteristica des mes tipiques dera nòsta espècia – e que mos ajuden a èster cada dia un pòc melhor. Solament per aquerò istòries de bendes dessenhades com era der Incal ja an un sens per eres madeishes. Qu’ei çò que Jodorowsky e Moebius an cercat pendent mes de ueit annades, pendent tota era sua vida. Dar-li sens ad aguesta vida, ara nòsta pròpria vida, ei ua mission que, com John Difool, solament podem hèr nosati madeishi. E açò ei era istòria der Incal. Açò ei dilhèu era istòria dera nòsta espècia.

Christian Andreu