Que son dus estatsunians, dus britanics, ua russa, un japonés e un marcian qui son sus l’ISS, non n’ei pas briga ua blaga, mes l’idea sus la quau estó fondat lo filme LIFE : origina inconeguda, qui sortí lo 19 d’abriu 2017 en França e que l’equipa Diu Negre e vedó tà vos.
Realizat peu suedés Daniel Espinosa (Safe house 2012, 
Child 44 2015), aqueth filme au budget consequent (58M$) que ns’amuisha ua beròja tropa d’actors, per la màger part acostumats au genre de la SF, com Jake Gyllenhaal (Source code 2011), Ryan Reynolds (X-Men Origins 2009, Green Lantern 2011 e Self/less 2015), Hiroyuki Sanada (Helix 2014 e The Last Ship 2016), Naoko Mori (Doctor Who 2005) e d’autes qu’èm mei acostumats a véder dens los filmes d’accions com Rebecca Ferguson (Mission impossible : Rogue Nation 2015), o que n’èm pas acostumats a véder e pro au cinèma, com Ariyon Bakare e Olga Dihovichnaya.
La realitat com fondacion
En efèit lo productor David Ellison qu’explica l’origina deu scenari en partir de la mission de Curiosity, qui avèva per mission d’anar sus Mars e de préner escantilhatges deu sòu deu planeta entà determinar s’estó o pas un enviroament favorable a la vita. David Ellison qu’a donc causit d’extrapolar los resultats d’aquera mission (actuaument sus Mars) en patir deu principi que los escantilhatges marcians e portarén dab eths la vita :
« Dab Dana Goldberg qu’avóm l’idea iniciau a l’epòca quan Curiosity e vienèva d’aterrir. Que’s seré passat se lo rover avèva descobèrt ua vita unicellulara sus Mars e se l’avèva tornada portar sus l’ISS tà analisar ? Un còp qu’aquera fòrma de vita e’s seré trobada dens condicions favorabla au son desvolopament, qu’averé començat a créisher… E com ei tostemps lo cas dab l’espècia umana, qu’averém cercat – dab las intencions mei bonas – a l’analisar e que’s seré revelada ostila. Que transfòrma lo filme en un thriller de sciéncia-ficcion orrific incrediblament tenut dens l’ISS, en gravitat zèro. »
En bèth partir d’aqueth punt lo filme n’escon pas las soas referéncias, sustot au filme de Rylder Scott sortit en 1979, qu’ac avetz endevinat, Alien, lo ueitau passatge.
Enlà deu ligam enter la mission Curosity e lo filme, aqueste qu’ei tanben lo parat de descobrir l’estacion internacionau (ISS) peus dehens, las scènas en exterior que son raras, dab la volontat probable d’ahortir lo sentit pesantèr qui’ns gaha quan èm embarrats en endrets claus. Ací l’immensitat de l’espaci n’ei pas lo catalisader de la paur mes pas sonque un enviroament qui condemna los passatgèrs a demorar a l’interior dab Calvin, quiò qu’ei lo nom de la creatura… Imaginatz-ve longs correders, estreits e tant per tant just esclairats, e que sentitz haut o baish çò que podem sentir en espiar LIFE arrapat au son sèti enropat peu negre de la sala de projeccion…
L’avís deu Diu Negre
Un filme deus bons o un filme d’arren ? La question qu’ei mei complèxa qu’aquò e que depen hèra de la sensibilitat de cadun. Se los filmes de sciéncia-ficcion com Alien, lo ueitau passatge o Doom que v’agradan, LIFE que v’agradarà pr’amor que’s fondan tots tres suu principi d’ua vita aliena ostila que l’òmi e desvelha e ne pòt pas mei controlar, quan l’accion en lo tresau ei mensh presenta, qu’èm meilèu sus la tension e la paur que sus la desbondada. Mes enlà d’aquera similitud suu hons, LIFE que pòrta un messatge que ne trobam pas en los autes filmes evocats. En efèit, lo filme de Daniel Espinosa que’ns parla de la vita, d’aquera corruda frenetica qui ne sofreish pas nada trava e qui ne tranteja pas a destrusir los autes tà contunhar. LIFE que’ns hica davant los nostes actes en los ns’amuishar peu biaish d’ua creatura extraterrèstra, qui ei capabla com nosautes de tuar tà susvíver.
LIFE qu’ei donc tau Diu Negre un filme de sciéncia-ficcion deus bons, qui n’a pas a vàder roi davant los classics deus quaus s’inspira. Lo scenari per estar corrut e plan coneishut, que s’i escad d’evitar las facilitats e los personatges, luenh d’estar estereotipats, que ns’amuishan mei umans que los umans davant ua tau situacion. Los actors que s’i hèn dab engenh e n’assistim pas a la sacro-santa fin quan lo eròi e sauva ad eth solet tota l’umanitat. Que demandar mei ?
Ei un filme shens nat defaut ? Non, que coneishetz lo Diu Negre, que’n tròba tostemps un. S’i a ua critica a har ad aqueth filme, qu’ei la soa fin. N’ei pas maishanta suu hons, n’ei pas un happy end a l’estatsuniana e qu’ei hèra plan realizada, mes qu’ei tròp de bon endevinar e qu’ei de dòu har.
Se passam sus aqueth punt, qui n’ei pas briga hastiau, l’equipa Diu Negre que’vs conselha aqueth filme qui’vs guardarà desvelhats quasi duas òras e qui’vs harà espiar lo planeta Mars d’un aute espiar…
Diu Negre
Ps: taus curiós ua fòto de Calvin 😀
diunegre.com 