Reverberacion (II)

Per Laurenç Revèst

II

Letras7

Fa un clar de nuech. Gàrdio per la fenèstra, vesent lo levar d’un satellit. Lo satellit es roge e vira entorn de la planeta Letras7. L’ordinator e lo radar foncionan coma previst. Ren de visible coma dangier.

Aurai lo temps de manjar, acabar de dorsiers, e gardiar de programas a la television. Es miejanuech de l’ora de la nòstra planeta. E pi, de lassitge, lo temps d’entrar en la cabina de sòm. Sieis oras mai tardi, serem drevilhats…

Va èsser l’ora de se cojar, escrivo un pauc sus lo mieu casèrn numeric :

Adieussiatz! Me sio ren presentaa. Me sòno Rea, sètz ja entrats dintre lo mieu univèrs. Se sètz aicí amb ieu es que sètz a legir lo mieu casèrn numeric de bòrd. Sio originala perqué sio naissua en l’espaci, es gaire corrent. E ai quarques amics coma ieu que son en un vaissèl dins l’imensitat de l’univèrs. Avèm fondat un grop intersideral perso privat quitament.

Mos parents son ensèm despí longtemps. An degut esperar avans d’aver una mainaa -tròp joves segon la mejana disia lo metge-, e pi sio arribaa. Brèu una vita classica.

Observo la vita familiala. Una vita agradiva a descubrir e dubrir las ments de las personas per io. Fau un pauc la psicològa de bòrd. Lo libre qu’escrivo m’ajua d’o far. Es conselhat de far aiçò per gardar una santat mentala dins l’espaci grand, se sentir ancorat qualque part. En lo ment. Sustot amb lo mestier dals parents. E me vòlon ren laissar sus la planeta de la grand…

Aicí, fau l’escòla amb los mieus parents, en l’escòla de nòstre vaissèl espacial.

Provarai de far coma mon papa que se ditz Aergos e ma mama que se ditz Sela. Los sòno de còups « Papa Aergos » e « Mama Sela » o coma sio grandeta aüra, directament per lor prenom. E i es lo frairòt, Tom, ne’n parlo gaire, qu’es pichinin ancara.

Vaquí nòstra vita.

Après ben de trantalhs e de trabalhs per s’orientar, las sieus capacitats lor permetèron al final de realizar lor pantais comuna, trabalhar dins l’Espaci. Son Gardas de Rets (GdR) per l’Organisme de Seguretat das Comunicacions Interplanetàrias (OSCI). Papa ditz « Qu’avèm una vita per participar a la maquina umana e a l’umanizacion de la màquina. Èsser cada un al servici de la societat ».

En lo detalh, fan tot de causas que capisso gaire. « Son especialistas en los sieu domènis e interdependents dins una societat que s’estende sensa fin, totjorn a la conquista de quarquaren » coma ditz mama. Perqué ne’n voler mai, sempre?

Coma sio ancara a l’escòla, fau coma trabalh practic l’ajua de mos parents e de tenir l’istoric de nòstres trajèctes. Dèvon assegurar las ligasons entre cada part das zònas ocupaas per los òmes: seguretat das merças, bèstias, e mai rarament de personas. Nòstra ret umana es centraa sus lo sistèma solar de Terrabis.

Terrabis es lo nom codificat dal sistèma qu’es lo centre de nòstres desplaçaments. Per la pichina istòria, nòstre sistèma solar fuguèt lo setzen colonizat despí l’Èra d’Expansion (que benlèu conoissètz ren totes nòstra granda e complicaa istòria espaciala).

A l’origina, mos parents vivion sus la planeta setena, « Letras Set », mai importanta planeta dal nòstre sistèma. Mas ne’n son ben luenhes aüra. Son ben pagats per aquela vita de viatges. Son pagats en monea « l’Equivalent TT » (temps-trabalh) que permete de comprar de bens d’una valor equivalenta al trabalh necessari a la sieu fabricacion segon lo temps que passam al trabalh e la valor que cream.

Enfin bòn tot de causas peniblas e autres sigles que se devèm de saber per respònder a l’administracion coma per beneficiar d’una Cubertura Parciala de Securitat Sociala.

Ancuei avèm comprat las resèrvas per manjar a la cantina. Pi acompanhèro papa al parcatge de la basa per pilhar lo veïcul de patrolha. Avans, passar recuperar mama e la pilòta per lo trabalh, que se metia a nivèl per menar amb un sistèma de logicial novèl. Dins una cobla que trabalha, per l’emplegaire es melhor vist d’aver un parèl en la mema foncion, e se possible sensa enfants al principi. Es recomandat per passar las vacanças en meme temps e pensar al trabalh al meme temps. E permete quitament de pensar a d’amelioracions en lo trabalh, la rendabilitat en far de remarcas sus l’un e l’autre. Mas de còups me demando a que mos parents pantaisan. E io, cu sap ieu amb cu me mariarai, ont es aüra aquel que rescontrarai un jorn, de que fa? Seria risolier d’o rescontrar ja…

Vaicí. Sio fatigaa, per ieu es l’ora de durmir. A deman