Er estrangèr penjaire

image-2

Liéger Philip K. Dick ei tostemps un plaser. Non cau qu’era istòria sigue ua publicada en es desparières recopilacions dera sua òbra. Era sua lectura ei tanben ua suspresa des beròies. Era istòria o conte Er estranger penjaire ei ua d’aqueres istòries de sciéncia-ficcion qu’ei malaisit de trapar en eth mon des publicacions en paper. Totun, Internet a encara pagines fantastiques, magiques, on se poden trapar vertadèrs tresaurs dera literatura. E sens aver de pagar.

Atau, www.gutenberg.org ei aué ua des libreries online qu’an mes libres publicadi gratuïtaments. E a tot tipe de genres. Entre aguesti tanben es de sciéncia-ficcion e fantasia an desenes de pagines amb un nombre mes que gran de libres d’autors classics coma Arthur Conan Doyle o H.G.Wells mès tanben de modèrns coma Lovecraft o Philip K. Dick. Bèri uns se poden trapar tradusidi en lengues granes coma eth francés, er espanhòu o er alemand mès era majoritat son publicades en era sua lengua originau. E aguest ei eth cas de Philip K. Dick e Er Estrangèr Penjaire (The Hanging Stranger) publicat per prumèr còp ena revista SCI-Fi Adventures en 1953. Ua vertadera joia de Dick e dera literatura d’aguest genre.

En çò que tòque ath conte cau soslinhar en prumèr lòc qu’era istòria ja pren era atraccion deth lector dempuèi eth prumèr moment. Pòqui escrivans poden meritar en aquerò. E eth mèstre Dick contunhe de demostrar qu’ei un mèstre deth genre dempuèi era prumèra pagina. E açò qu’era temàtica non a arren a véder damb androids que se revouten internament coma en Somien es androids damb oelhes electriques ? (Do Androids Dream of Electric Sheep ?) (1968) (eth libe sus eth quau se basec un des filmes mes mistics dera sciéncia-ficcion deth sègle XX, Blade-Runner (1982).

Quina ei donques aguesta istòria que capte era atencion deth lector des des prumères linhes ? Ua istòria qu’ei susprenenta pr’amor que trinque era realitat e hè patir eth lector en tot véder que i a quicòm que foncione pas e aquerò hè suspectar qu’açò ei pas bon.

Podem imaginar a travèrs dera descripcion que hè Philip K. Dick ua plaça carrada, coma es tipiques qu’avem vist en tanti filmes americani des anades 50. En aguesta i a divèrses tendes mès en ua d’aguestes i trabalhe era persona que patirà un vertadèr mau-som pr’amor que vederà ua causa qu’ei pas logica, pas racionau.

Racionalitat contra irracionalitat

Ed Loyce pren com cada jorn eth sòn coche entà se n’anar a trabalhar. Quan arribarà ath lòc de trabalh vederà ua causa totauments irracionau. Èm en er an 1953 e d’ua lantèrna de carrer i penge un òme. Coma se encara visquérem ena epòca der oèst deth sègle XIX. Mas aquerò pòt èster encara possible en 1953 o aué ? Philip K. Dick mestreje es linhes que viurà Loyce en tot avisar es auti vesins dera plaça der òme penjat. Toti l’an vist ja e cap d’eri pense qu’aquerò sigue un hèt excepcionau. Era ànsia de Loyce ei cada còp mes e mes gran. Era vision der òme penjat e era tranquillitat des vesins deth vilatge son ua pròva dera irracionalitat des hèts.

Lèu arribarà era patrolha de policia locau que volerà saber perqué tanti crits. Loyce en aguesti moment sage de compréner coma ei possible era fauta d’atencion des policièrs. E comence a pensar que tot, es vesins, era policia e dilhèu eth vilatge sencer demoren en ua dimension parallela que non a arren a véder damb era realitat. Era sua realitat. O dilhèu qui viu en ua dimension parallela ara realitat reau ei Loyce e pas es auti…

image1

D’aguesta manera comence Philip K. Dick a descríver ua tematica fòrça utilisada en eth genre dera sciéncia-ficcion. Un hèt que poirie semblar normau ac ei pas en ua auta epòca e lòc. I a ua transgression de realitats que capte era atencion deth lector dempuèi es prumères linhes. E ac hè en tot onorar eth sòn domeni literàri.

Volèm pas contunhar d’explicar çò que se passe en aguesta magnifica istòria – cuerta pr’amor qu’a solament 17 pagines – de sciéncia –ficcion de Philip K. Dick, Er estrangèr penjaire. Compartiram damb es aimants deth genre qu’era suspresa – aquerò que hè un bon conte literàri d’aguest genre o d’auti – ei lèu revelada e que non per açò eth lector baisharà era atencion. Aguesta se manten enquias pagines darrères pr’amor qu’encara n’i a ua auta , era suspresa finau. Dilhèu pòc originau dins eth nòste genre aué mès fòrça originau en – pensem – er an 1953.

Arrecomanem era lectura d’aguesta istòria cuerta de Philip K. Dick. De prumèr pr’amor qu’ei ua bona ocasion de liéger un Dick en era lengua originau. Dempús pr’amor qu’ei ua ocasion beròia d’aver mes referéncies literàries d’un mèstre dera sciéncia –ficcion. E tresau pr’amor qu’ei gratuïtaments. Damb era eth coneishença dera istòria dera sciéncia-ficcion serà mes prigonda. E aquerò pes aimants deth genre, non a prètz.

.Christian Andreu

Er estranger penjat version PDF

One thought on “Er estrangèr penjaire

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out / Cambiar )

Twitter picture

You are commenting using your Twitter account. Log Out / Cambiar )

Facebook photo

You are commenting using your Facebook account. Log Out / Cambiar )

Google+ photo

You are commenting using your Google+ account. Log Out / Cambiar )

Connecting to %s